طلب عاجل ( صيد القراميط )

فى
البدايه موضوع السجل الاجرامى بتاع القرموط اللى اتكلم عليه اخوانا عمر
النوبى مفيد لينا جدا الا انى بتفق معاه فى موضوع انى مش باكلها وبتفق
كمان مع هيرو فى ان صيدها ممتع الكلام كتر صح نخش فى الجد

بالنسبه
للسجل الاجرامى للقرموط بيدل على ان السمكه دى رمرامه بمعنى ان اى شيء له
رائحه نفاذة (عفونه طبعا) سورى فى اللفظ دة يعتبر وجبه شهيه للفقيد (
القرموط) طبعا لازم اللى عاوز يطلع احجام كويسه يستحمل

انواع الطعم وطرق الصيد

العنب البناتى

فى
كتير يستغرب لما يسمع كدة لكن فعلا دى طريقه مشهورة جدا فى الصعيد وهى انك
بيكون السن بتاعك متوسط الحجم يعنى 6 مثلا وبتقوم بوضع مجموعه من حبات
العنب فى السن وعى الشعر اللى فوق السن على هيئه سبحه وطبعا بيكون الرصاص
تقيل وبترمى فى العمق والصبر بقى يلعب دوره

وطبعا القرموط ممكن يجى على اى طعم يعنى غله دود ارض جمبرى عجينه ولكن فيما يلى عجينه موجهه مباشره للقرموط

العجينه الخاصه ( برجاء استعمال الواقى الخاص بالغازات السامه والروائح النفاذة) ههههههههه

طبعا
لكلنا عارفين طريقه العجينه العاديه ولكن الاختلاف فى العجينه دى انى بضيف
اليها دم اى زبيحه وبقوم بالعجن كويس ليصبح القوام متماسك استنى لسه مش
هتروح تصطاد دلوقتى لا انتا هتقوم بوضع العجينه دى فى كيس بلاستك محكم
الغلق ونقوم بدفنها فى الارض لمدة يومين او تلاته طبعا انتو عارفين ايه
اللى هيحصل وبعد كدة بنطلع الجثه اقصد العجينه من الارض طبعا مع استخدام
القناع الواقى ويلا بقى روح اصطاد وجمد قلبك

اما بقى لو كنت مستعجل وعاوز تروح تصطاد بسرعه ومش هتستنى يومين او تلاته محلوله برضه

هتروح عند اى عطار وتقوله عاوز ريحه ( الحنتيت) افتكر الاسم كويس وبدل الدم على العجينه هتحط الريحه دى وطبعا الريحه دى بتغنى عن ترك العجينه تتعفن فى الارض لان هى بتقوم بالواجب

على فكرة الطريقه دة مجربه لانى قلتها لواحد ومازال يستعملها وصدقونى بيدعيلى كل لما بيرجع من الصيد

يلا بقى عاوز التجربه وتقولولى النتيجه

واى استفسار انا فى الخدمه دايما

واسف مرة تانى على التأخير والتقصير